Роспотребнадзор Саха сиринээҕи салаатын салайааччыта Маргарита Игнатьева «Якутия 24» ханаалга «Актуальное интервью» биэриигэ уһун өрөбүллэр кэмнэригэр ханнык тэрилтэлэр үлэлээбэттэрин туһунан быһаарда.
«Алтынньы 30 күнүттэн сэтинньи 7 күнүгэр диэри киһи олоҕор наадалаах эрэ тэрилтэлэр үлэлиэхтэрэ: мэдиссиинэ тэрилтэлэрэ, бырамыысыланнас тэрилтэлэрэ, аптекалар, бородуукта маҥаһыыннара. Атыы-эргиэн, атыы-сынньалаҥ кииннэрэ, комплекстара, малы атыылыыр ырыынактар, дьаарбаҥкалар, парикмахерскайдар, кэрэ буолуу солуоннара, косметическай солуоннар, спа-кииннэр, массаас кэбиниэттэрэ, туристическай баазалар, комплекстар, сынньалаҥ баазалара, фитнес-кулууптар, тренажернай саалалар, спортивнай саалалар, манежтар, хайыһар баазалара, хаҥкылыыр сирдэр, спортивнай-сынньатар тэрилтэлэр, атын хаҥкылыыр сирдэр, хайыһар уларсар пууннар, хайыһардыыр пууннар, бассейннар, баанньыктар, сауналар, солярийдар үлэлээбэттэр», — диэн Маргарита Игнатьева эттэ.
14 саастарыгар диэри оҕолор уопсастыбаннай миэстэлэргэ төрөппүттэрэ суох сылдьаллара көҥүллэммэт. Алтынньы 30 күнүттэн сэтинньи 7 күнүгэр диэри фудкорттар атыы-эргиэн кииннэригэр үлэлээбэттэр.
«Кинилэр дистанционно үлэлиир буолуохтара. Сэтинньи 8 күнүттэн атыы-эргиэн кииннэригэр 14 саастарыттан үөһээлэри QR-кодунан киллэрэр буолуохтара. Бу вакцинацияны толору ааспыттар, ыалдьан баран үтүөрбүттэр, ПЦР-тесттээх эбэтэр мед отводтаах дьон сылдьаллара көҥүллэнэр», — диэтэ Маргарита Игнатьева.
Кини этэринэн, алтынньы 30 күнүттэн сэтинньи 7 күнүгэр диэри уопсастыбаннай аһыыр сирдэр олохтоох бириэмэнэн киэһэ 22:00 чааска диэри үлэлиэхтэрэ, оттон сэтинньи 8 күнүттэн үлэ кэмэ 23:00 чааска диэри уһуоҕа. Манна QR-кодтаах эрэ дьон сылдьара көҥүллэнэр.
«Култуура эбийиэктэригэр коронавирустан быһыыны ылбыт уонна ыалдьан үтүөрбүт эрэ дьон сылдьар. Вакцина ылбытын туоһулуур QR-код, сертификат, 72 чаастан ордуга суох кэмнээх ыалдьыбатын туһунан түмүктээх ПЦР эбэтэр мед отвод ыспыраапката ирдэнэр. QR-коду таһынан туоһулуур докумуоннар — паспорт, эбэтэр суоппар удостоверениета ирдэнэр. Мааскалаах сылдьыы эрэһиимин уонна социальнай дистанцияны тутуһуу көрүллэр. ОРВИ-нан ыарыынан ыалдьыбыт киһи киирэрэ көҥүллэммэт. Саала иһигэр 50% көрөөччү көҥүллэнэр. Култуура тэрилтэтигэр оҕолор төрөппүттэрин кытта эбэтэр учууталларын кытта сылдьыахтарын сөп», — диэн Роспотребнадзор Саха сиринээҕи салаатын салайааччыта бэлиэтээтэ.
Бу өрөбүллэр маассабай тэрээһиннэри уонна дьиэ кэргэн бырааһынньыктарын тэрийиигэ бэриллибэтэҕин Маргарита Игнатьева бэлиэтээтэ.
«Уопсастыбаннай миэстэлэргэ сылдьары, уопсастыбаннай тырааныспарынан айанныыртан аҕыйатарга уонна вакцинаны ылыҥ сүбэлиибин», — диэн кини түмүктээтэ.
