Россияҕа коронавируһунан ыалдьыы муҥутуур үрдүк чыпчаала ыам ыйын 11 күнүгэр бэлиэтэннэ. Бу туһунан ТАСС иһитиннэрэр.
Ыам ыйын 11 күнүгэр дойду үрдүнэн биир суукка иһигэр саамай элбэх киһи коронавируһунан ыалдьыыта бэлиэтэммит — 11 656 киһи, диэн Россия вице-премьера Татьяна Голикова иһитиннэрдэ.
«Кулун тутар бүтүүтүттэн күннэтэ ыалдьыбыт дьон ахсаана 16 төгүл аччаата. Бу олус дьоһуннаах көрдөрүү, бүгүҥҥү туругунан бу көрдөрүү дойду үрдүнэн ортотунан 1,7-1,8 %-ҥа тэҥнэһэр», — диэн вице-премьер бэлиэтээтэ.
Эпидемиологическэй балаһыанньа чөлүгэр түһэн эрэр регионнарыгар, коронавируһу эмтииргэ туһаныллыбыт балыыһалары былааннаммыт көмө балыыһаларыгар көһөрүү ыытыллар.
