Оонньуу 24-с мүнүүтэтигэр Арсен Захарян пааһын кэннэ Словакия көмүскээччитэ Милан Шкриньяр сыыһа мээчиги тэбэн, бэйэтин боруотатыгар киллэрдэ.
Футболга Россия сүүмэрдэммит хамаандата 2022 сылга Катарга ыытыллар аан дойду күрэхтэһиитигэр сүүмэрдиир түһүмэххэ Словакияны 1:0 ахсаанынан кыайда. Киирсии Казань куоракка «Ак Барс-Аренаҕа» буолла. Бу туһунан ТАСС иһитиннэрэр.
Ол курдук, Россия сүүмэрдэммит хамаандата Валерий Карпин салалтатынан биир да хотторуута суох иһэр. Балаҕан ыйыгар Россия Хорватияны кытта тэҥнэспитэ (0:0) уонна Мальтаны, Кипры 2:0 ахсаанынан кыайбыта.
Словакияны кытта киирсиигэ хамаанда хапытаана «Зенит» полузащитнига Далер Кузяев буолла. Россия сүүмэрдэммит хамаандатын састаабыгар «Сочи» көмүскээччитэ Сергей Терехов, «Зенит» оонньооччулара Дмитрий Чистяков уонна Алексей Сутормин бастакыларын оонньоотулар.
Билигин Россия бэйэтин бөлөҕөр 16 очкуолаах иккис миэстэҕэ иһэр.
Аны алтынньы 21 күнүгэр Россия хамаандата Марибор куоракка Словенияны кытта киирсэр.
