Дойду саамай ураты скульптураларын бүтүн Россиятааҕы куонкуруһун түмүктүүр куоластааһына саҕаланна. Бу туһунан куонкуһу тэрийээччи Туту.ру серсив пресс-сулууспата иһитиннэрэр.
«177 тыһыынчаттан тахса киһи дойду 10 саамай ураты скульптуратын куоластаан талла. Россия олохтоохторо өссө икки нэдиэлэ иһигэр саамай уратыны талар кыахтаахтар», — диэн этиллэр.
Уон бастыҥ скульптура кэккэтигэр Дьокуускай куорат киин киинэ тыйаатырын иннигэр турар бөх хомуйааччы скульптурата киирдэ.
Туту.ру хамаандата хас биирдии кыттааччы 3D модельын оҥордо. Кыттар скульптуралар кыра киэптэрин, кинилэр тустарынан иһитиннэриини уонна дьикти чахчылары (ааптара, туохтан оҥоһуллубута, кээмэйэ, туох түбэлтэни кытта сибээстээҕэ) куонкурус сайтыгар киирэн көрүөххэ сөп.
Түмүктүүр куоластааһын ахсынньы 29 күнүттэн тохсунньу 11 күнүгэр диэри ааһар (Москва бириэмэтинэн киэһэ 21.00 чааска бүтэр). Туту.ру «ВКонтакте» страницатыгар киирэн куоластыахха сөп.
