Орел куоракка ыытыллыбыт Ыччат спартакиадатыгар, оҕунан ытыыга МИКС хамаанда иһигэр (көннөрү оххо), сахалар көмүс мэтээлгэ тигистилэр. Хамаанда иһигэр бастыҥ көрдөрүүнү ситистилэр Рената Курчатова уонна Алексей Михайлов. Бу туһунан «Спорт Якутии» иһитиннэрэр.
«Мин оҕунан ытыы успуорт көрүҥэр хара бастакы күммүттэн ылларбытым. Онтон атын тугу да санаабат этим. Урут успуорду, художественнай уһуйаан дьарыктарын кытта дьүөрэлиир этим. Бириэмэ биллэн турар туохха да тиийбэт этэ, бэл аһаабакка да хааларым. Оскуоланы бүтэрдэхпинэ дьэ элбэх иллэҥ бириэмэлэнэрим буолуо дии санаабытым, оннук буолбатах эбит, хата төттөрүтүн олох быыһа-арда суох олох саҕаланна. Нэдиэлэ устата алта күн субуруччу дьарыктанабын. Билигин, Токиоҕа буола турар Олимпиаданы күннэтэ кэтиибин, биһиги охчуттарбытыгар ыалдьабын, кинилэр кыайыыларыгар олус үөрбүтүм», — диэн Рената кэпсээтэ.
Билигин, Рената үрдүк үөрэх кыһатыгар туттарсарга уонна Улан-Үдэҕэ, Читаҕа буолан ааһыахтаах Россияҕа Чемпионатын Кубогар бэлэмнэнэр.
Барыта, бу тыҥааһынаах спорт көрүҥэр кыттыыны ылбыттара дойду 30 эрэгийиэниттэн 400 кэриҥэ спортсмен, ол иһигэр 21 киһи Саха сириттэн.
