Кураан сайын турбутунан, өрөспүүбүлүкэҕэ сүөһү аһылыгар эбии үп көрүллүөҕэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Ил Дархан Айсен Николаев илин эҥэргэ оту бэлэмнээһин хаамыытынан Чурапчы улууһугар сүбэ мунньах тэрийдэ. СӨ тыа хаһаайыстыбатын министиэристибэтин көрүүтүнэн 373,3 тыһыынча туонна от бэлэмнэниэҕэ, бу былаан 81%-гар тэҥнэһэр.
Сороҕун билигин ыраах сирдэргэ үлэлии сылдьар мобильнай биригээдэлэринэн оттотуохтара. Ол от 40 тыһыынча туоннаҕа тэҥнэһиэҕэ.
Маны таһынан, оту Амурскай, Магаданскай уобаластартан, Забайкальскай кыраайтан атыылаһыахтара.
Дьүүллэһии түмүгүнэн, Айсен Николаев өрөспүүбүлүкэ бырабыыталыстыбатыгар, сотору кэминэн оту тиэйиини саҕалыырга, бүддьүөттэн үп көрөргө соруйда.
Кэккэ оройуоннарга, бастатан туран, Уус Алдан, Горнай, Өймөкөөн, Томпо улуустарыгар кыһыҥҥы суол туруоҕар диэри от тиийбэтинэн сибээстээн, кылгас болдьоххо дуогабар хампаанньатын ыытан, тиэйиини саҕалыыр наада.
Биир сүрүн сорук — тыа хаһаайыстыбатыгар эбии аһылыкка эбии үбү көрүү.
Маны таһынан, ветеринария департаменыгар ынах сүөһү кыһыны этэҥҥэ туорууругар битэмиини уонна эми атыылаһыны саҕалыырга соруйдулар.
