Кулун тутар 12 күнүгэр 19:15 чааска НВК «Саха», «Якутия24» телеханаалларга, ону тэҥэ «Тэтим» араадьыйаҕа СӨ судаарыстыбаннай былааһын толорор уорганнарын отчуотун түмүктүүр эпиир көстүөҕэ. Быһа эпииргэ СӨ Бырабыыталыстыбатын бэрэссэдээтэлэ Кирилл Бычков, СӨ Бырабыыталыстыбатын бэрэссэдээтэлин солбуйааччылара уонна миниистирдэр ааспыт сыллааҕы үлэ түмүгүн таһаарыахтара, ону тэҥэ улуустар, куораттааҕы уокуруктар олохтоохторун кытта ыытыллыбыт көрсүһүүлэр түмүктэрин сырдатыахтара.
СӨ Бырабыыталыстыбатын отчуоттуур тэрээһиннэрэ өрөспүүбүлүкэ бары 36 муниципальнай оройуонугар уонна куораттааҕы уокуругар ыытылыннылар. Былаас толорор уорганнарын бэрэстэбиитэллэрэ өрөспүүбүлүкэ 445 нэһилиэнньэлээх пуунугар сырыттылар.
Үлэ түмүктэрин ырытыыга 29 тыһ тахса олохтоох кыттыыны ылла.
Ону таһынан, үлэлиир бөлөхтөр нэһилиэнньэни кытта тус көрсүһүүлэри эмиэ ыыттылар. Бу көрсүһүүлэр чэрчитинэн 1,5 тыһ киһини кытта кэпсэттилэр. Олохтоохтор ыйытыыларын биэрдилэр уонна сирдэригэр-уоттарыгар баар кыһалҕалары быһаарарга анаммыт этиилэри киллэрдилэр.
Дьон-сэргэ ыйытыытын уонна баҕа санаатын быһа эпиир кэмигэр төлөпүөнүнэн уонна МАХ мессенджер нөҥүө биэрэр кыахтаах.
Хаартыска: sakha.gov.ru
