Томпо улууһугар атырдьах ыйын 14 күнүн түүнүгэр Илиҥҥи Хаандыга өрүһү туоруур кэмҥэ сүппүт 73 саастаах эр киһини көрдүүлэр. Барыллаан дааннайдарынан, Теплай Ключ бөһүөлэгиттэн Илиҥҥи Хаандыга диэки түөрт эр киһи «КрАЗ» массыынанан айаннаабыт. Өрүһү туоруулларыгар булчуттар массыыналара батыллан хаалбыт.
Үс киһи биэрэккэ тахсыбыт — сайабылыанньаны биэрбит киһи, 60 саастаах эр киһи уонна кини 15 саастаах уола. Саамай саастаахтарын сүүрүк массыынаттан илдьэ барбыт. Эр киһи матрастан тутуспут. Бу туһунан биир быыһаммыт киһи сатыы Теплай Ключ бөһүөлэгэр тиийэн тыллаабытын кэннэ биллибит.
Көрдүүр үлэҕэ Теплай Ключ бөһүөлэгин дьаһалтатын үлэһиттэрэ уонна волонтердар кыттыбыттар. Уу таһыма үрдүгүттэн уонна күүстээх сүүрүктэн биэрэк лииньийэтин бастакы чинчийии туох да түмүгү аҕалбатах. Көрөр сири кэҥэтээри квадрокоптер туһаныллыбыт.
Бу түбэлтэ миэстэтигэр Дьокуускай куораттан СӨ Быыһыыр сулууспатын водолазтара кэллилэр. Кинилэр гидролокатор көмөтүнэн 7100 квадратнай миэтэрэ иэннээх акваторияны чинчийбиттэр уонна аҕыс төгүл умсубуттар. Сүппүт киһи көстүбэтэх. Бүгүн көрдүүр үлэни салгыыллар.
Хаартыска: СӨ Быыһыыр сулууспатын пресс-сулууспата
