СӨ үүнэр көлүөнэтин тыйаатыра Кытайга алтынньы 22-26 күннэригэр кэнсиэрдээтэ. Артыыстар Хэйлунцзян провинция Цзямусы, Фуцзинь уонна Фуюань куораттарыгар «Дьол тааһа» диэн испиктээги көрдөрдүлэр. Бу тэрээһиннэр Россия уонна Кытай норуодунай өрөспүүбүлүкэтин култуураларын сылларын чэрчитинэн ыытылыннылар.
Бу туһунан тыйаатыр пресс-сулууспата иһитиннэрэр.
«Испиктээк Кытай көрөөччүтүн биһиги өрөспүүбүлүкэбитигэр олорор хотугу норуоттар туһунан билиһиннэрэр уус-уран айымньы буолар. Манна төрүт саха култууратын, уобарастарын, мифологиятын көрдөрдүбүт. Көрөөччүлэр сүрүн дьоруойу Хонины кытта иччилэр дойдуларыгар сырыттылар», — диэн тыйаатыр телеграм-ханаалыгар суруйбуттар.
Ону тэҥэ тыйаатырга бэлиэтииллэрин курдук, Кытай оҕолоро испиктээги олус диэн интэриэһиргээн көрбүттэр.
«Биһиги култуурабыт, сиэрбит-туоммут Кытайга биһирэбили ылбытыттан үөрэбит. Бу биһиги норуоттарбыт икки ардыларынааҕы култуурунай атастаһыы суолталааҕын бигэргэтэр», — диэн тыйаатыр иһитиннэрэр.
Ол курдук, 300, 700, 1000 миэстэлээх саалалар толору көрөөччүлээх буолбуттар. Ону тэҥэ, испиктээк кэнниттэн, оҕолор артыыстары сыанаттан түһэрбэккэ эрэ автограф ылаары үөрбүттэр-көппүттэр.
Тыйаатыр бу сырыыта регионнар икки ардыларынааҕы култуурунай сибээһи бөҕөргөттө уонна көрөөччүлэргэ умнуллубат түгэннэри бэлэхтээтэ диэн артыыстар бигэ эрэллээхтэр.
Хаартыска: СӨ үүнэр көлүөнэтин тыйаатырын телеграм-ханаала
