Уһук илиҥҥэ 256 срезтээх компьютернай томограбы саҥа кардиокииҥҥэ туруоруохтара. Аныгы медицинаҕа бу аппарат саамай чопчутук көрөрүнэн биллэр. Хаачыстыбалаах түһэрии диагноһы түргэнник туруорарга улахан көмө буолуоҕа.
«Холобур, билигин 2-с нүөмэрдээх балыыһаҕа 64 срезтээх томограф турар. Саҥа аппарат түөрт төгүл үчүгэйдик көрдөрүөҕэ», – диэбит өрөспүүбүлүкэтээҕи кардиологическай диспансер дириэктэрэ, медицина наукатын доктора Кюндюла Иванова. Билигин диспансерга 1,5 тесла кыамталаах МРТ турар. Сүрэҕи араас өттүттэн көрдөрөр, уустук эпэрээссийэҕэ пациены бэлэмнииргэ саамай наадалаах аппарат. Саҥа кардио-кииҥҥэ саҥа МРТ, УЗИ аппараттары ыллылар.
«Биһиги кииммит аныгы оҥоһуулаах буолуоҕа, билигин Россия сүрүн кииннэрин технологияларынан үлэлиэхпит. Онон нэһилиэнньэ сүрэҕин уонна тымырын ыраах барбакка эрэ эмтэнэр кыахтанар», – диэбит Ил Дархан Айсен Николаев.
Билигин кардио-киин ис өттүн оҥороллор. Барыта биэс операционнай үлэлиэҕэ — үс аһаҕас уонна икки ангиографическай. Кардиологическай диспансер үлэлээтэҕинэ, 2024 сылга диэри сүрэх ыарыыта 364-тан 279-ҕэ диэри түһүөхтээх. Сыл бүтүөр диэри тиэхиньикэ монтаһа түмүктэниэхтээх.
