Тохсунньу тоһуттар тымныытын аахсыбакка, уһун өрөбүллэргэ таах сыппакка Саха сирин эдэр боксердара саҥа сылга дьарыктарын номнуо саҕалаабыттара. Тохсунньу 2 күнүттэн Бороҕоҥҥо, Николай Тарскай аатынан саҥа спорт уораҕайыгар, түөрт улуустан сүүстэн тахса эдэр спортсмен эрчиллэр тэрээһиҥҥэ түмсүбүттэрэ.
Соторутааҕыта 17-гэр диэри саастаах уолаттарга Саха сирин сүрүн тириэнньэринэн анаммыт Василий Шестаков салалтатынан күҥҥэ иккитэ дьарыктаналлар, кэлэр күрэхтэһиилэргэ бэлэмнэнэллэр.
Бэҕэһээ Бороҕоҥҥо эдэр боксердарга Европа икки төгүллээх чемпиона, аан дойду чемпионатын үрүҥ көмүс призера, Россия биэс төгүллээх чемпиона Василий Егоров ыалдьыттаата.
Бастаан Василий Михайлович үөрэнэр-дьарыктанар түмсүүгэ сылдьар боксер оҕолору кытта атах тэпсэн олорон кэпсэттэ, спорка анаабыт олоҕун туһунан сиһилии кэпсээтэ, араас ыйытыыларга хоруйдаата. Көрсүһүү түмүгэр хас биирдии кэлбит оҕоҕо автограф биэрдэ, хаартыскаҕа түһүстэ, онон кэскиллээх боксердары кыайыыга-хотууга, ситиһиигэ кынаттаата.
Салгыы ааттаах-суоллаах боксер оҕолорго анаан-минээн дьарык ыытта. Бастатан турар, дьарык үчүгэйдик ааһарыгар эти-хааны уһугуннарыы, сүһүөхтэри имитии улахан суолталааҕын өссө төгүл санатта. Кэскиллээх боксердар Василий Егоровы кытта тэҥҥэ дьарыктанан, сүбэлэрин сиргэ-буорга түһэрбэккэ болҕойон иһиттилэр, астыннылар. Аатырбыт боксер тириэнньэр тылын истэр, кини сорудаҕын толорор улахан суолталааҕын, ситиһии төрдө буоларын тоһоҕолоон эттэ.
Родион Кривогорницын
