Өрөспүүбүлүкэ киин куоратын аэропордун көтөр-түһэр балаһата өрөмүөннэниэҕиттэн 379 рейси оҥордулар. Бу туһунан аэропорт пресс-сулууспата иһитиннэрэр.
Киин куорат аэропордугар пассажир эргиирэ эмиэ улаатта – атырдьах ыйын 26 күнүнээҕи туругунан, 35 638 киһи көттө, ити ааспыт сыллааҕар икки төгүл элбэх. Аэропорт саҥардыллыбыт балаһата аһыллыаҕыттан 12 таһаҕас таһар рейстэр оҥоһулуннулар.
Санатан эттэххэ, 3 250 миэтэрэ усталаах Дьокуускай аэропордун көтөр-түһэр балаһата сөргүтэн оҥоруу кэнниттэн атырдьах ыйын 17 күнүгэр аһыллыбыта. Балаһа уотун саҥардан оҥордулар, «Браво» РД-B салайар суол үлэҕэ киирдэ.
2021 сыл саҕаланыаҕыттан «Дьокуускай» аэропордунан 492 053 пассажир туһанна. Бу ааспыт сыллааҕы көрдөрүүттэн 35,7%-нан улахан көрдөрүү. Россия киин куораттарыгар диэри көнө рейстэр сөргүтүллүбүттэринэн уонна ордук киэҥник тарҕаммыт хайысхаларынан көтүү элбээбитинэн, 2021 сылга пассажирдары таһыы оннунан хаалара күүтүллэр.
Ол курдук, «Северный Ветер» авиахампаанньа Дьокуускайтан Москваҕа диэри көнө рейси алтынньы 4 күнүттэн сөргүтүөҕэ, «Сибирь»/S7 Airlines авиахампаанньа балаҕан ыйын 20 күнүттэн Дьокуускай-Москва-Дьокуускай рейси аһары былаанныыр. «Дьокуускай» аэропорт атын авиахампаанньалары кытта кэпсэтиини ыытар.
