Саха сирин бөҕөстөрө Белоруссия уонна Румыния сүүмэрдэммит хамаандаларын кэккэлэригэр көҥүл тустууга Европа чөмпүйэнээтигэр бириистээх миэстэлэри ыллылар. Бу туһунан «Спорт Якутии» иһитиннэрэр.
Ньургун Скрябин Римҥа 65 киилэҕэ диэри ыйааһыннаах бөлөххө үрүҥ көмүс мэтээли ылла. Маҥнайгы эргииргэ Молдоваттан сылдьар Максим Сакулцаны кыайда, иккис түһүмэххэ 2019 сылга Астанаҕа ыытыллыбыт аан дойду чөмпүйэнээтин боруонса мэтээл хаһаайынын Исмаил Мусукаевы хотто.
Кыһыл көмүс мэтээл иһин киирсиигэ Ньургуна Скрябин утарсааччытынан Красноярскайга «Иван Ярыгин» аатынан турнин кыайыылааҕа дагестан бөҕөһө Курбан Шираев буолла.
Боруонса мэтээл хаһаайынынан буолбут Николай Охлопков маҥнайгы киирсиигэ Грузияттан сылдьар аан дойду чөмпүйүөнэ Бека Ломтадзеҕа хоттордо. Ол кэннэ аччыгый финалга азербайджан бөҕөһүн Интигам Велизадены кыайда.
