Ил Дархан Айсен Николаев Быһа биэриитигэр Саха сирин киинэтэ 2000 сыллартан саҕалаан 961 мөлүйүөн солкуобайы киллэрдэ диэн иһитиннэрдэ. Сотору кэминэн 1 млрд солк куоһарара күүтүллэр.
Аан дойдуга Россия киинэтин ситиһиитин 25%-нын саха киинэлэрэ ылаллар.
Ил Дархан бэлиэтииринэн, 2023 сылга саха киинэлэрин каассабай хомуурдара 100 мөл кэриҥэ солк тэҥнэспит, 2024 сылга — номнуо 157 мөл солк, оттон 2025 сыл түмүктэринэн 280 мөл солк тиийбит.
Ону таһынан, Саха сирэ толору кээмэйдээх киинэни оҥорон таһаарыыга иккис миэстэҕэ тахсыбыт. Бастакы миэстэҕэ — Москва.
Киинэ инфраструктуратын сайдыытын үлэтэ ыытыллар. Дьокуускайга дойду бэрэсидьиэнэ Владимир Путин сорудаҕынан толору цикллаах павильон бырайыактааһына саҕаланна, бу киин куорат маастар-былааныгар киирэ сылдьар. Павильон тутуута сыл устата киинэни уһулар кыаҕы биэриэҕэ, ону тэҥэ аныгы павильоннарынан, тыаһы-ууһу уһулар устуудьуйаларынан, хартыынаны кытта үлэлиир оборудованиенан уонна анал тиэхиньикэнэн хааччыйыаҕа.
