Сэтинньи 12-28 күннэригэр Эстонияҕа Таллин куоракка «Темные ночи» киинэ бэстибээлигэр Саха режиссера Владимир Мункуев уһулбут «Нуучча» киинэтин көрдөрүөхтэрэ. Бу туһунан «Саха» НКИХ иһитиннэрэр.
КиноОФФ сүрүн бырагырааматыгар норуоттар икки ардыларынааҕы бэстибээллэргэ бириистэринэн наҕараадаламмыт Россия саҥа киинэлэрин көрдөрүөхтэрэ, ол иһигэр Саха киинэтэ киирэр.
Ону тэҥэ «Нуучча» киинэ «Свежие веяния» бырагыграамаҕа киирэр. Манна киэҥ эйгэҕэ интэриэһинэй, биллиилээх бэстибээллэргэ ситиһиилээх киинэлэри көрдөрүөхтэрэ. «Темные ночи» бэстибээл аан дойду бастыҥнарын ахсааныгар киирэр, киинэ продюсердарын аан дойдутааҕы ассоциацияларын федерациятын чилиэнэ буолар.
Киинэ сюжета Польша суруйааччыта уонна этнограф Вацлав Серошевскай айымньыларыгар олоҕурда.
XIX-с үйэ бүтүүтүнээҕи Дьокуускай уобалаһа көстөр. Киинэҕэ, иккис оҕолорун кистээн баран Саха сирин тыйыс айылҕатыгар уонна томороон тымныытыгар тыыннаах хаалаары салгыы туруулаһар Хабдьыйа уонна Кэрэмэс тустарынан кэпсэнэр.
Биирдэ олохтоох кинээс кинилэри кытта сокуон быһыытынан олоруохтаах Костя диэн нууччаныны аҕалар. Уопсай тылы булуу хара маҥнайгыттан табыллыбат, бу киһи бэйэтэ дьиэ хаһаайына буоларга сананар.
Киинэ аан маҥнай «Темные ночи» бэстибээлгэ Works in Progress Awards бырагыраамаҕа кыайыылааҕынан тахсыбыта.
Ол кэннэ киинэ норуоттар икки ардыларынааҕы Карловы Вары куоракка ыытыллыбыт киинэ бэстибээлигэр East of the West куонкуруска Гран-при буолбута, «Кинотавр» 32-с киинэ бэстибээлигэр «Бастыҥ режиссура» анал аакка кыайбыта.
