Чурапчы улууһун биир киэн туттар ыччата, улуустааҕы ыччат түмсүүтүн бастыҥ уопсастыбанньыга, Чурапчы нэһилиэгин «Ыллыыр ыччат» ансаамбылын солиһа, «Саха» НКИХ Чурапчытааҕы филиалын оператора Аман Винокуров «Муус устар» ыччат бэстибээлин чэрчитинэн быйыл төрдүс төгүлүн ыытыллаары турар «Сулустар – 2024» өрөспүүбүлүкэтээҕи ырыа күрэһин сүүмэрдиир түһүмэҕин ааһан, Чурапчы улууһун көмүскүүр чиэскэ тигистэ.
Манна өрөспүүбүлүкэ араас муннуктарыттан 15 эдэр ырыаһыт финалга тахсар иһин киирсиэхтэрэ, бу кэнниттэн талыллыбыт биэс бастыҥ ырыаһыт күөн-күрэһин быһа эпииринэн Саха сирин олохтоохторо көрүөхтэрэ.
Күрэскэ Гран-при 115 000 солк, көрөөччү биһирэбилэ — 57 500 солк уонна Гран-при хаһаайынын уһуйааччыта 57 500 солкуобай харчынан наҕараадаланыахтара.
