«Саха» национальнай көрдөрөр-иһитиннэрэр хампаанньа Улуу Кыайыы 75 сыллаах үбүлүөйүн уонна Саха сиригэр биллэриллибит Ийэ дойдуга бэриниилээх буолуу сылын чэрчитинэн, Аҕа дойду Улуу сэриитин кэмигэр биир дойдулаахтарбыт дьоруойдуу быһыыларын үйэтитиигэ, ону тэҥэ үүнэр көлүөнэ ыччаты дойдубут уонна өрөспүүбүлүкэбит хорсун историятыгар олоҕуран иитиигэ туһаайыллар араадьыйа биэриилэрин куонкуруһун биллэрэр.
Куонкуруска кыттыы босхо. Үлэлэр аймахтаргыт уонна биир дойдулаахтаргыт дьоруойдуу быһыыларын, бэтэрээннэр олохторун, мэтээллэр уонна уордьаннар историяларын туһунан буолуон сөп. Киирбит матырыйааллар «Саха» НКИХ «Тэтим» араадьыйатын эфиригэр тахсыахтара.
Кытыыны 7 -17 саастаах оскуола оҕолоро ылыахтарын сөп. Киирэр араадьыйа-биэриилэри кытта кытааччы толору аата, дьиэтин аадырыһа, төлөпүөнүн нүөмэрэ ыйыллыбыт сайаапка ирдэнэр.
Куонкуруска кыттар үлэлэри тутуу болдьоҕо: муус устар 26 күнүгэр диэри.
Түмүк 2020 сыл муус устар 30 күнүгэр тахсыаҕа. Кыайыылаахтары наҕараадалааһын ыам ыйын 8 күнүгэр ыытыллыаҕа.
Аудиороликтары «Радио конкурс «Кыайыы сулуһа-Звезда Победы» диэн бэлиэлээх ыйыллыбыт электроннай почтаҕа ыытыҥ: radiosakha@mail.ru
Куонкурус балаһыанньатын сиһилии билсиҥ.
