«Саха» национальнай көрдөрөр-иһитиннэрэр хампаанньа аан маҥнайгытын онлайн выпускной ыытта. Өрөспүүбүлүкэ бары муннуктарыттан оскуоланы бүтэрэр оҕолор бэйэлэрин эҕэрдэ видеоларын ыыттылар, санааларын үллэһиннилэр, инники былааннарын сырдаттылар. Оскуолалар дириэктэрдэ, учууталлар уонна төрөппүттэр бэйэлэрин эҕэрдэлэрин тириэртилэр.
«Аан дойдуга дьэ дьикти саас буолла, оҕолор барахсаттар хомойуох иһин бүтэһик чуорааҥҥа мустан, кутаа уот иннигэр гитаранан ыллаабатылар, бэйэ-бэйэлэрин көрсүбэтилэр. Ол эрэн биһиги хампаанньабыт бары оскуоланы бүтэрээччилэргэ бэлэх оҥорон «Олох киэҥ аартыгар бииргэ» диэн бырайыакка барыларын бииргэ муста», — диэн «Саха» НКИХ генеральнай дириэктэрэ Олег Марков бэйэтин инстаграм аккаунугар суруйда.
Онлайн выпускной бүгүн, ыам ыйын 31 күнүгэр сарсыарда 10:00 чаастан киэһэ 18:00 чааска диэри буолла. Түмүгэр кыттааччылар бары бириэмэ капсулатын хааллардылар.
