Саха өрөспүүбүлүкэтин бырабыыталыстыбата хотугулуу-илиҥҥи Азия дойдуларын ассоциациятын сессиятыгар, региоҥҥа коронавирус усулуобуйатыгар үөрэҕи тэрийии туһунан дакылаатынан кытынна. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Тэрээһин балаҕан ыйын 28 күнүгэр Хотугу форум чэрчитинэн видео-сибээс эрэһииминэн ааста. Олайн-сессияҕа өрөспүүбүлүкэ бырабыыталыстыбатын бэрэссэдээтэлин солбуйааччытын э.т. Сергей Местников кыттыыны ылла. Кини Саха сиригэр коронавирус усулуобуйатыгар үөрэҕи тэрийии туһунан дакылааты билиһиннэрдэ.
«Саха сиригэр 800-тэн тахса оҕо уһуйаана, 649 оскуола, 43 орто анал уонна үрдүк үөрэх кыһата, 211 эбии үөрэхтээһин тэрилтэтэ баар. Онуоха оскуола иннинээҕи иитии-үөрэтии уонна уопсай үөрэхтээһин тэрилтэлэрин 70-ча %-на тыа сиригэр баар. Үгүс оскуола аҕыйах оҕолоох уонна ыраах сытар тиийэргэ уустук сирдэргэ баар», – диэн Сергей Местников эттэ.
2020 сыл кулун тутар ыйыгар өрөспүүбүлүкэ оскуолалара бары биир түгэҥҥэ дистанционнай үөрэтии эрэһиимигэр көһүүлэригэр, Саха сиригэр кэлиҥҥи сылларга цифровой инфраструктураны сайыннарыы ыытыллара төһүү күүс буолбутун вице-премьер э.т. бэлиэтээтэ. Ону тэҥэ оскуолалар, оҕо уһуйааннара уонна эбии үөрэхтээһин тэрилтэлэрэ бары интернет сибээстээхтэрэ көмөлөстө.
«Пандемия саҕаланыыта өрөспүүбүлүкэ бары оскуолалара интернеккэ холбоммут уонна көмпүүтэрдэринэн хааччыллыбыт эбит буоллахтарына, дьиэтээҕи интернет бары оҕоҕо баар буолбатах этэ. Технически ханна кыалларынан, кылгас кэм иһигэр дьиэтээҕи интернеты холбооһун боппуруоһа быһаарыллыбыта», – диэн эттэ.
Маны таһынан дистанционнай үөрэхтээһини хааччыйар сыалтан, Саха сирин педагогтара кылгас кэм иһигэр квалификацияны үрдэтии куурустарын ааспыттара.
