Саха сиригэр, Ил Дархан Айсен Николаев сорудаҕынан, байыаннай дьайыы кыттыылаахтарыгар уонна дьиэ кэргэттэригэр аадырыстаах көмө салҕанар диэн бүгүҥҥү брифиҥҥэ СӨ бырабыыталыстыбатын бэрэссэдээтэлин солбуйааччы Георгий Степанов иһитиннэрдэ.
Ол курдук, бүгүҥҥү күн туругунан, 113 ыал дьиэтэ күөх төлөн ситимигэр холбонно, 350-чэ төрөппүт санаторнай эмтэниини ааста, 300-тэн тахса киһи байыаннай сулууспалаах эмтэнэр сиригэр айанныыр кыах ылла.
Медицинскэй уонна социальнай тэрилтэлэргэ 800-чэкэ байыас уонна 1000 кэриҥэ чугас дьоно анал реабилитацияны аастылар.
Маны тэҥэ көрүллэр өйөбүллэртэн биирдэстэрэ — үлэнэн хааччыйыы, эбии үөрэҕи ааһыы буолар. Дьарыктаах буолуу киинигэр 536 киһиттэн 321 киһи үлэ булла.
