«Саха сирэ – Дьоруойдар дойдулара» каадыр бырагыраамата саҥа түһүмэххэ тахсар, кыттааччыларга бэйэлэрин сатабылларын үлэҕэ туһанар кыаҕы биэрэр. Бырагыраама курсааннарын быһыытынан талыллыбыт анал байыаннай дьайыы бэтэрээннэрэ өрөспүүбүлүкэ үрдүнэн олохтоох бэйэни салайыныы уорганнарыгар стажировкаҕа киирдилэр.
Бырайыак 14 муниципальнай тэриллиини хабар – бырамыысыланнастаах Алдантан хотугу Хаандыгаҕа диэри регион сайдыытын араас өттүн хабар.
Стажировкалар алта нэдиэлэ устата салҕаныахтара уонна өрөспүүбүлүкэ киин куоратыгар да, ыраах сытар оройуоннарга да тэриллибиттэр. Бу бырагыраама кыттааччыларыгар хас биирдии чопчу муниципалитет иннигэр турар актуальнай соруктары быһаарыыга дириҥник киирэр, сыаналаах уопут ылар кыаҕы биэриэҕэ.
Саамай элбэх курсант, аҕыс киһи, Дьокуускай куоракка стажировканы ааһар. Өлүөнэ, Ньурба уонна Нөөрүҥгүрү оройуоннара иккилии стажердары ылаллар. Ону тэҥэ Алдан, Амма, Горнай, Мэҥэ-Хаҥалас, Нам, Өлүөхүмэ, Таатта, Томпо, Хаҥалас уонна Чурапчы оройуоннарыгар уопут ыла тиийдилэр.
«Саха сирэ – Дьоруойдар дойдулара» бырагыраама Инновационнай менеджмент Үрдүкү оскуолатын өйөбүлүнэн олоххо киирэр, методологическай арыаллааһыны хааччыйар, үөрэх муодулларын оҥорор уонна, уопсайынан, курсааннар үлэлэрин көрөр. Инновационнай менеджмент Үрдүкү оскуолата өрөспүүбүлүкэ социальнай-экэниэмикэ сайдыытын соруктарын көдьүүстээхтик быһаарар кыахтаах саҥа көлүөнэ салайааччыларын бэлэмнээһиҥҥэ сүрүн оруолу оонньуур.
Ил Дархан Айсен Николаев көҕүлээбит, Владимир Путин «Дьоруойдар кэмнэрэ» федеральнай көҕүлээһинин салгыыр регионнааҕы каадыр бырайыага «Саха сирэ – Дьоруойдар дойдулара» Анал байыаннай дьайыы бэтэрээннэрин уонна кыттааччыларын салайар хамсааһыҥҥа киллэриигэ туһуланар. Бырагыраама кинилэргэ бэйэлэрин лидерскэй уопуттарын уонна сыалга дьулуурдарын төрөөбүт өрөспүүбүлүкэ сайдыытыгар туһанар кыаҕы биэрэр, уонна регион кэлэр кэскилгэ инвестициялыырга бэлэмин, дойдуну көмүскээбит дьон кыаҕын туһанан көрдөрөр.
