Ил Дархан Айсен Николаев үлэтинэн М.К. Аммосов аатынан Хотугулуу-Илиҥҥи федеральнай университет ректорын Анатолий Николаевы кытары көрүстэ. Кинилэр Саха сиригэр норуоттар икки ардыларынааҕы уонна бүтүн россиятааҕы таһымнаах улахан тэрээһиннэри ыытыы туһунан дьүүллэстилэр.
Анатолий Николаев Дьокуускай куоракка балаҕан ыйын 24-27 күннэригэр V төгүлүн ыытыллар Хотугу форумҥа бэлэмнэнии хаамыытын иһитиннэрдэ. Бэлиэтээн эттэххэ, бу форумҥа М.К. Аммосов аатынан ХИФУ сүрүн тэрийээччинэн буолар.
«Биһиги Хотугу форумтан билим да өттүгэр билигин да суолталаах ылыныылары күүтэбит. Тэрээһин үрдүк таһымнаахтык ааһыахтаах. Ол туһугар биһиги университеппыт туох баар күүһүн ууруоҕа диэн эрэллээхпин», — диэн Айсен Николаев эттэ.
Маны таһынан, вузтар икки ардыларынааҕы кампус тутуутун туһунан кэпсэттилэр. Итиэннэ «Билии» уопсастыба «Билии. Бастыҥнар» федеральнай просветительскай марафонун бэлэмнэниитин туһунан дьүүллэстилэр.
