Саха сирэ нэһилиэнньэ уонна төрүүр оҕо ахсаана үрдээһинин көрдөрүүтүнэн Уһук Илиҥҥи уокурукка маҥнайгы миэстэҕэ таҕыста уонна Россия уон бастыҥ регионнарын кэккэтигэр киирдэ. Бу туһунан СӨ доруобуйа харыстабылын министиэристибэтэ тириэрдэр.
«2019 сыл тохсунньу-сэтинньи ыйдарын көрдөрүүтүнэн өрөспүүбүлүкэҕэ төрүүр оҕо ахсаана 1000 киһиэхэ 13,3-кэ тэҥнэстэ, бу дойду үрдүнээҕи көрдөрүүттэн 30,4 %-нан уонна Уһук Илиҥҥи уокурукка 18,8 %-нан үрдүк. Өлүү-сүтүү 1000 киһиэхэ 7,9-ка тэҥнэстэ, бу Россия уонна Уһук Илин регионнарыттан 35,8 %-нан намыһах», — диэн СӨ доруобуйа харыстабылын миниистирэ Елена Борисова иһитиннэрдэ.
Социальнай хамсааһын көрдөрүүтэ тупсуутугар нэһилиэнньэ ортотугар ыарыы уонна өлүү-сүтүү намтаабыта этиллэр. Ол курдук, 2019 сыл 11 ыйын устата хаан ыарыытыттан өлүү көрдөрүүтэ 100 тыһыынча киһиэхэ 354,5-кэ тэҥнэспит, бу дойду көрдөрүүтүттэн 1,6 төгүл уонна Уһук Илиҥҥэ 1,5 төгүл намыһах. Искэҥ ыарыытыттан өлүү 100 тыһыынча киһиэхэ 142,6-ҕа тэҥнэспит, бу 1,4 төгүл намыһаҕа бэлиэтэнэр.
«Манан салайтаран, «Демография» национальнай бырайыагы олоххо киллэрии иитиинэн, СӨ доруобуйа харыстабылын салаата нэһилиэнньэ олоҕо уһуурун уонна төрөөһүн ахсаана үрдээһинин ситиспитэ буолар. Өрөспүүбүлүкэҕэ олох олоруу уһунун орто көрдөрүүтэ 71,7 сааска тэҥнэһэр, дьахталларга 77,1 сааска, эр дьоҥҥо — 66,4. Бу Уһук Илиҥҥи уокурук үрдүнэн саамай үрдүк көрдөрүү буолар», — диэн Елена Борисова эттэ.
