Ил Дархан Айсен Николаев Беларусь Өрөспүүбүлүкэтигэр үлэ сырыытын чэрчитинэн «Беларусьфильм» национальнай киинэ устуудьуйатыгар сырытта, манна киинэни оҥоруу толору циклин тэрийиини, павильоннар үлэлэрин уонна тэрилтэ техническэй инфраструктуратын кытта билистэ. Көрсүһүү түмүгүнэн «Сахафильм» генеральнай дириэктэрэ Алексей Егоров уонна «Беларусьфильм» генеральнай дириэктэрэ Дмитрий Семенов бииргэ үлэлэһии туһунан сөбүлэҥҥэ илии баттаатылар, онтон сүрүн пуунунан уус-уран киинэни устуу буолла.
«РФ Бэрэсидьиэнин сорудаҕынан Дьокуускайга Уһук Илиҥҥэ саамай улахан толору цикллаах киинэ павильона тутулла турар. Онон киинэни оҥоруу толору циклин, павильоннар үлэлэрин уонна техническэй инфраструктураны тэрийиигэ белоруссиятааҕы биир идэлээхтэрбит уопуттара Саха сирин киинэтин индустриятын сайыннарыыга ордук интэриэһинэй», – диэн Айсен Николаев бэлиэтээтэ.
««Беларусьфильм» хампаанньа Саха сирин норуоттар икки ардыларынааҕы киинэ бэстибээлигэр кыттыбыта, оччолорго биһиги холбоһуктаах бырайыактар тустарынан кэпсэтэн турабыт. Билигин биһиги быраактыкаҕа көһөн эрэбит: уопсай киинэни устуохпут, сценарий бырайыага номнуо баар, режиссердар икки өттүттэн быһаарылыннылар. Киинэ чопчу аатын билигин ааттыыр кыахпыт суох, ол эрээри киинэ уопсай сыаннастары, норуоттар доҕордоһууларын уонна үтүө устуоруйаны таарыйарын этиэхпитин сөп. Биһиги былааммыт барыта хайаан да олоххо киириэ, Россия уонна Беларусь көрөөччүлэрэ бу киинэни экраҥҥа көрүөхтэрэ диэн эрэнэбит», – диэн «Сахафильм» генеральнай дириэктэрэ Алексей Егоров эттэ.
«Беларусьфильм» генеральнай дириэктэрэ Дмитрий Семенов холбоһуктаах бырайыак бэлэмнэнии түһүмэҕиттэн быраактыкаҕа тахсан эрэрин туһунан иһитиннэрдэ.
«Биһиги өрөспүүбүлүкэлэрбит икки ардылара ыраах да буоллар, киинэ – бу дьону, култууралары уонна дьылҕалары холбуур муоста буолар. Ол иһин биһиги бу үлэни улахан көҕүлээһиннээхтик ылынабыт. Эһиилгиттэн устуу хаамыытыгар тахсар былааннаахпыт, Саха сириттэн сылдьар биир идэлээхтэрбитин кытта мэлдьи сибээстэһэбит. Устуулар Белоруссияҕа да, Россияҕа да ыытыллыахтара», – диэн Дмитрий Семенов кэпсээтэ .
Ону тэҥэ өрөспүүбүлүкэ баһылыга Беларусь өттүгэр Саха сирин сыыппаранан киинэ прокатын эйгэтигэр уопутун үөрэтэргэ этии киллэрдэ. Региоҥҥа «Экстра Синема» платформа ситиһиилээхтик үлэлиир – бу Россияҕа кыра нэһилиэнньэлээх пууннарга аналлаах бастакы толору хааччыллыылаах сыыппаранан киинэ прокатын систиэмэтэ, кини саамай ыраах сытар сирдэр олохтоохторун киинэ саҥа таһаарыыларынан хааччыйар.
Хаартыска: оҥоһуу өй
