Саха сирин делегацията «Об общих принципах организации местного самоуправления в единой системе публичной власти» федеральнай сокуон бырайыагын бырайыактыыр-ырытар сессиятын мунньаҕар кытынна. Мунньах кэмигэр өрөспүүбүлүкэҕэ улуус баһылыктара, олохтоох уонна өрөспүүбүлүкэ депутаттара, Саха сирин уопсастыбаннай палататын чилиэттэрэ кыттыылаах кэпсэтии кэнниттэн киирбит көннөрүүлэри иһитиннэрдилэр.
Бүтүн Россиятааҕы олохтоох бэйэни салайыныы сайдыытын ассоциациятын (ВАРМСУ) көҕүлээһининэн федеральнай сокуон бырайыага Судаарыстыбаннай дуума иккис ааҕыытыгар тиийэ илигинэ дьүүллэһии ыыттылар. ВАРМСУ-га уопсайа дойду бары регионнарыттан 800-тэн тахса көннөрүү киирбит.
Сессия хаамыытыгар Саха сирин делегацията сокуон бырайыагар улуустар территорияларын оннунан хаалларар туһунан этиини киллэрдилэр.
Ону таһынан, Дьокуускай куораттааҕы Дуума депутаттарыттан федеральнай сокуон бырайыагар регион баһылыга олохтоох ситэриилээх былааһыттан сүбэлээбит хандьыдааттарыттан регионнар кииннэрин баһылыктарын талыы балаһыанньатын бигэргэтэргэ көҕүлээһин киирдэ.
«Маннык ньыма билигин дойду үрдүнэн түөрт регионтан ураты барыларыгар көхтөөхтүк үлэлиир. Билиҥҥи кэмҥэ улахан куораттар баһылыктара бэлиитик буоллалларын оннугар куорат хаһаайыстыбатын салайыыга, административнай-хаһаайыстыбаннай салалта уонна бүддьүөт систиэмэтэ хайдах үлэлиирин бэркэ билэр идэтийбит салайааччы буолуохтаахтар», — диэн Саха Өрөспүүбүлүкэтин муниципальнай тэриллиилэрин сэбиэтин бэрэссэдээтэлэ Степан Саргыдаев эттэ.
Ону тэҥэ Саха сирин делегацията тыа сирин баһылыктарын уонна кинилэр хамаандаларын оннунан хаалларар туһунан этиилэри киллэрдэ.
