VII-c Илиҥҥи экономическай форум чэрчитинэн Саха сирэ социальнай уонна экономика эйгэтигэр кырата 30 инвестиция туһунан сөбүлэһиилэргэ илии баттаһар былааннаах.
Былырыын өрөспүүбүлүкэ 25 млрд солк. суумалаах инвестиция туһунан сөбүлэһиилэри түһэрсибитэ.
«Бу сөбүлэһиилэр олоххо киириилэрэ сүрүн сыала – дьон олоҕун хаачыстыбатын тупсарыы буолар» — диэн VI-с Илиҥҥи экэнэмиичэскэй форум түмүгэр Ил Дархан Айсен Николаев эппитэ.
Холобур, ааспыт сыл сөбүлэһиилэрин түмүгүнэн, социальнай эбийиэктэри тутууга үбүлээһин көрүллүбүтэ, Дьокуускай, Нерюнгри куораттар территорияларыгар тутуулар ыытыллыбыттара, «Саха АССР 100 сылыгар – 100 оптуобус» бырагыраама чэрчитинэн дьону тиэйэр тырааныспар паарката саҥардыллыбыта. Үөһээ Дьааҥы улууһун Улахан Күөл нэһилиэгэр маҥнайгы гибриднай электроыстаансыйа үлэҕэ киирбитэ. Бу ыстаансыйа 2024 сылга диэри тутуллуохтаах 72 ыстаансыйалартан биирдэстэрэ.
Быйыл киэҥ хайысхаҕа болҕомто ууруллар. Бастатан туран, ВОЛС ситимнэрин кэҥэтиигэ үлэ барыаҕа, Усуйаана улууһугар сир баайын хостуур бырамыысыланнас кластера оҥоһуллуута, Сулҕаччы-Амма 110кВ кыамталаах үрдүк күүрүүлээх уот ситимэ тардыллыыта, тыа сиригэр почта дьиэлэрин аныгылыы тутуу, «Саханефтегазсбыт» эбийиэктэрин саҥардыы былааҥҥа баар.
