Бэс ыйыгар Дьокуускайга «Yakutia International Science Games-2022» норуоттар икки ардыларынааҕы өй оонньуутун очнай түһүмэҕэ бэс ыйыгар Дьокуускайга ыытыллара былааннанар. Оонньуу үс сүрүн тэрээһинтэн турурар: STEM-бырайыактар, научнай конференция уонна математика, физика, химия, информатика бирэдимиэттэригэр «Туймаада» олимпиадата.
Үүнэр көлүөнэ пуондатын генеральнай дириэктэрэ иһитиннэрбитинэн, билигин бастакы дистанционнай түһүмэх түмүктэнэн эрэр. Манна Россия 80 куоратыттан 1200-тэн тахса оҕо кыттар.
«Экспердэр уопсайа 2500-тэн тахса дьоҕус чинчийиини көрдүлэр. Бу күннэргэ түмүгү таһаарабыт. Очно ыытыллар тэрээһиҥҥэ Россия 20 куоратыттан уонна 10 дойдуттан 300-тэн тахса үөрэнээччи кыттара былааннанар», — диэтэ Егоров.
Санатан эттэххэ, бастакы норуоттар икки ардыларынааҕы оонньуулар Дьокуускайга 2018 сыллаахха буолбуттара. Манна Россия 18 куоратыттан уонна 40 дойдуттан үөрэнээччилэр кыттыбыттара. Тэрээһин сүрүн сыала — науканан дьарыктанар оҕолор салгыы сайдалларыгар усулуобуйаны тэрийии.
