Симэлийэр кутталлаах ойуур бизонун ахсаана өрөспүүбүлүкэҕэ 10 төгүл элбээтэ, ол эбэтэр, билиҥҥи туругунан, 290 харамай баар. Бу туһунан ТАСС иһитиннэрэр.
Бастакытын бизоннары 2006 сыллаахха ууһуур сирдэрин кэҥэтэр, ахсааннарын элбэтэр туһугар аҕалбыттара. СӨ экология, айылҕа харыстабылын миниистирин бастакы солбуйааччыта Семен Яковлев иһитиннэрбитинэн, эһиил бизоннары Горнай уонна Сунтаар улуустарыгар көҥүлгэ ыытыахтара.
«Өрөспүүбүлүкэҕэ ойуур бизонун Саха сирин усулуобуйатыгар үөрэтии бырайыага олоххо киирэр, «Уус Буотамаҕа» бизоннар питомниктара үлэлиир», — диэн Семен Яковлев эбэн эттэ.
Учуонайдар дааннайдарынан плейстоцен кэмигэр ойуур бизона билиҥҥи Саха сиригэр ууһуу сылдьыбыт. Бу көрүҥү айылҕа харыстабылын сойууһун норуоттар икки ардыларынааҕы Кыһыл испииһэгэр киллэрбиттэрэ.
