2025 сылга Саха сиригэр Нэһилиэнньэ дьарыктаах буолуутун киинэ 14-тэн 18 саастарыгар диэри 4 563 оҕону үөрэхтэн босхо кэмигэр кылгас кэмҥэ үлэлэттэ. Бу туһунан Ыччат дьыалатыгар уонна социальнай коммуникацияларга миниистир Петр Шамаев иһитиннэрдэ.
«Оҕолору үлэҕэ ылыы – бу быстах кэмнээх дьарыктааһын эрэ буолбатах. Бу кинилэр олохторугар уонна идэлээх сайдыыларыгар суолталаах үктэл. Үлэҕэ бастакы хардыылар бэрээдэги уонна эппиэтинэһи олохтууллар. Эдэр көлүөнэҕэ бу араас эйгэҕэ бэйэтин боруобалаан көрөр, бастакы идэлээх сатабылларын олохтуур уонна бэйэтин үлэтин сыанатын билэр кыах. Оҕолор бэйэлэригэр сөптөөх үлэни көҥүллүк талалларын, айар уонна урбаан сатабылларын сайыннаралларын, олоххо туһалыыр сыаналаах уопуту мунньалларын ситиһии наада», – диэн Петр Шамаев эттэ.
Миниистир бэлиэтииринэн, маннык ньыманан оҕолор быраактыкаҕа сатабылы эрэ ылан хаалбакка, бэйэлэрин бас билиилэрин уонна тутулуга суох буолууларын сайыннараллар. Ону тэҥэ, үлэлиир кэмҥэ кинилэр бырааптарын харыстааһын наада. Урут Ил Дархан Айсен Николаев эдэр дьон үлэтэ бары сокуон ирдэбилин тутуһан тэриллиэхтээҕин бэлиэтээбитэ.
Быстах кэмнээх үлэттэн таһынан, оҕолорго уонна кинилэр төрөппүттэригэр быраап өттүнэн сырдатыыга улахан болҕомто ууруллар. Оҕолорго быраабынан көмөлөһүү Бүтүн Россиятааҕы күнүн чэрчитинэн 1,3 тыһыынчаттан тахса оҕо уонна кинилэр төрөппүттэрэ үлэҕэ киириигэ үөскүүр бырааптарын уонна эбээһинэстэрин туһунан толору иһитиннэриини ыллылар.
Оҕолору үлэҕэ ылыы РФ бэрэсидьиэнэ Владимир Путин көҕүлээбит «Каадырдар» национальнай бырайыак соруктарыгар сөп түбэһэр.
Хаартыска: СӨ Үөрэх уонна билим министиэристибэтин пресс-сулууспата
