Быйыл өрөспүүбүлүкэҕэ РФ Бэрэсидьиэнэ Владимир Путин көҕүлээбит «Инфраструктура для жизни» национальнай бырайагынан суол-иис 94,6 килэмиэтирин нуормаҕа эппиэттиир турукка түһэриэхтэрэ. Ол иһигэр 75 км — регионнааҕы суолталаах, оттон 6,9 км — Дьокуускай куорат агломерациятыгар олохтоох суолталаах. Маны таһынан 20 тыһыынчаттан тахса нэһилиэнньэлээх дьоҕус агломерацияларга 12,5 км саҥардыллыаҕа. Билиҥҥи туругунан нуормаҕа 28,6 км киирбитин туһунан СӨ Тырааныспарга уонна суол-иис хаһаайыстыбатыгар министиэристибэтэ иһитиннэрдэ.
Ол курдук, Дьокуускайга Россияҕа биир бөдөҥ оҕолорго аналлаах Адаптивнай үөрэх комплексыгар киирии суолга аспааллааһын үлэтэ түмүктэннэ. Сэргэлээх суолуттан үөрэх комплексын кыраныыссатыгар диэри 0,2 км усталаах учаастакка хапытаалынай өрөмүөн чэрчитинэн суол үлэһиттэрэ олоҕун бэлэмнээтилэр, суол бүрүөһүнүн аспааллаатылар уонна тротуар оҥордулар. Маны таһынан, сырдатыы лиинийэтин уонна наадалаах суол бэлиэлэрин туруордулар, разметканы оҥордулар. Эбийиэк үлэҕэ киирдэ.
Лиэнскэйгэ Дзержинскай уулуссаҕа 0,2 км усталаах — Пролетарскайтан Якутскайга диэри — суол учаастагар хапытаалынай өрөмүөн түмүктэннэ. Үлэһиттэр олоҕун бэлэмнээн баран, аспаал-бетон икки араҥатын уурдулар, сатыы сылдьар дьон куттала суох сылдьарыгар саҥа тротуар балаһатын оҥордулар. Эбийиэги бу күннэргэ үлэҕэ киллэрэргэ бэлэмнииллэр.
«Дзержинскай уулуссаҕа урут суох тротуардары оҥордулар. Сатыы сылдьар сирдэргэ тротуар плиткатын уурдулар, оттон суолга холбоһор сирдэргэ табыгастаах намтааһыннары оҥордулар. Оҕо кэлээскэтин анньарга олус табыгастаах уонна үчүгэй буолла», — диэн Лиэнскэй олохтооҕо Анна кэпсээтэ.
Ону таһынан, Кангаласска киирии суолга 6,6 км усталаах массыына суолугар хапытаалынай өрөмүөн түмүктэннэ. Бу трасса өрөспүүбүлүкэ тирэх суолун ситимин чааһа буолар, ону тэҥэ чох карьерыгар уонна «Кангалассы» бырамыысыланнай пааркаҕа тырааныспар тиийэрин хааччыйар. Маны таһынан, бу сынньанарга киэҥник биллибит сиргэ — Өлүөнэ өрүскэ көстүүлээх «Кангаласский мыс» көрөр былаһааккаҕа айанныыр суол. Үлэ кэмигэр гравий бүрүөһүнү икки араҥалаах аспаал-бетон сабыыга уларыттылар, барыллаан суол олоҕун бөҕөргөттүлэр. Ону кытта сырдатыы лиинийэтин, тротуардары уонна уопсастыбаннай тырааныспары кэтэһэргэ павильоннары оҥордулар.
Санатар буоллахха, былырыын Кангаласска барар суолга өссө 6 км усталаах учаастагы толору өрөмүөннээбиттэрэ. Билигин суол 12,6 килэмиэтирэ нуормаҕа эппиэттиир турукка киирдэ. Оттон 2025 сыл түмүгүнэн национальнай бырайыагы олоххо киллэрии түмүгэр Саха сиригэр 130-чэ км массыына суолун үлэҕэ киллэрдилэр, ол иһигэр 109 км кэриҥэ — регионнааҕы ситим. Бу элбэх муниципальнай тэриллии олохтоохторун тырааныспарга тиийимтиэтин уонна олохторун хаачыстыбатын биллэ үрдэттэ.
Хаартыска: sakha.gov.ru
