2022 сыл саҕаланыаҕыттан «Баһаартан сэрэхтээх буол – АДПИ туруор!» аахсыйа чэрчитинэн 469 ыалга автономнай баһаары сэрэтэр тэрили туруордулар. Бу туһунан СӨ нэһилиэнньэ олоҕор куттала суох буолууну хааччыйар судаарыстыбаннай кэмитиэт пресс-сулууспата иһитиннэрэр.
«Бу сыл саҕаланыаҕыттан социальнай аахсыйа чэрчитинэн судаарыстыбаннай баһаарынай сулууспа чааһын үлэһиттэрэ 738 АДПИ тэрили туруордулар», — диэн судаарыстыбаннай кэмитиэккэ кэпсээтилэр.
Бэлиэтээн эттэххэ, баһаары сэрэтэр социальнай аахсыйа 2021 сылга саҕаламмыта. Бу сыл «22 сылга 22 бастыҥ көҕүлээһин» диэн бырайыак чэрчитинэн Саха АССР 100 сыллаах, Госкомобеспечение 10 cыллаах, Баһаарынай манабыл 205 cыллаах үбүлүөйдэрин көрсө ыытыллыаҕа. Бырайыак өҥөтүнэн Саха сирин үрдүнэн 1850 АДПИ элбэх оҕолоох ыал дьиэтигэр, соҕотох олорор кырдьаҕастарга уонна доруобуйаларынан хааччахтаах дьон дьиэлэригэр турда.
АДПИ – автономнай баһаары сэрэтэр тэрил кыра да буруо сытыгар улахан тыас таһааран дьону сэрэтэр. Оннооҕор түүн ортото тыаһаан дьону уһугуннаран иэдээн тахсарыттан сэрэтэр аналлаах. Хас биирдии ыал дьиэтигэр маннык тэрил баар буолуохтаах. Аахсыйа туһунан сиһилии нэһилиэнньэ олоҕор-дьаһаҕар куттала суох буолууну хааччыйар Судаарыстыбаннай кэмитиэт саайтыгар ааҕыахха сөп.
