Өрөспүүбүлүкэҕэ 73 тыһ гектар иэннээх ходуһа охсуллубут уонна 45 812 туонна оту бэлэмнээтилэр, былаан 10%-на туолла. Бу туһунан СӨ бырабыытылыстыбатын уонна баһылыгын дьаһалтатын пресс-сулууспата иһитиннэрэр.
От ыйын 25 күнүнээҕи туругунан окко 7351 звено, 9460 трактор уонна 23163 киһи үлэлиир.
Билигин оту бэлэмнээһиҥҥэ Үөһээ Дьааҥы, Кэбээйи, Горнай, Чурапчы оройуоннарыгар уустук балаһыанньа бэлиэтэнэр. От үлэтигэр күн-дьыл туруга мэһэйдэри үөскэтэр.
Ардах халааныттан эмсэҕэлээбит Үөһээ Дьааҥы уонна Кэбээйи оройуоннар нэһилиэнньэлээх пууннарыгар регион таһымнаах ЧС эрэһиимэ биллэриллибитэ. Чурапчы улууһугар кураантан сылтаан от үүнүүтэ, хаачыстыбата мөлтөх. Ону тэҥэ Бүлүүгэ, Үөһээ Бүлүүгэ, Горнайга элбэх ардахтар түһэннэр оттуур ходуһалар, суоллар ууга барбыттар.
Бүлүү уонна Үөһээ Бүлүү оройуоннарыгар СӨ тыатын хаһаайыстыьатыттан Упрмелиоводхоз уулаах учаастактарга ханааллары ыраастаан ууну ыытарга үлэ тэрийдэ.
Ону таһынан, Россельхозцентр 13 киин, Бүлүү бөлөх, өрүс нөҥүө сытар улуустарга 23,8 тыһ. га иэннээх ходуһаны бэрэбиэркэлээтилэр, ол түмүгэр 820 га иэннээх сиргэ аһыҥа баара бэлиэтэннэ.
Ордук элбэх аһыҥа Сунтаар, Ньурба, Таатта, Чурапчы, Уус Алдан оройуоннарыгар баар. Мэҥэ Хаҥаласка, Уус Алдаҥҥа, Ньурбаҕа, Өлүөхүмэҕэ, Чурапчыга ходуһалары эмтээтилэр. Хаһаайыстыбалар 340 лиитирэ эмп ыллылар.
