Саха сиригэр үлэ кэмигэр коронавирус дьаҥыгар сутуллубут 50 кэриҥэ медицина үлэһитэ страховой төлөбүрү ылла. Страховой төлөбүр сууммата 3 440 550 солкуобайга тэҥнэһэр диэн СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«От ыйын 6 күнүгэр Саха сирин үрдүнэн 68 медицина үлэһитэ ыалдьыбыта бэлиэтэнэр. Күн бүгүн страховой төлөбүрү 50 үлэһит ылла. Төлөммүт харчы уопсай сууммата 3 440 550 солкуобайга тэҥнэһэр. Хаалбыт 13 үлэһит быраастан ылбыт справкалара кэллэҕинэ, сарсыҥҥы күнү хойутаппакка түһүөҕэ. Оттон уустуга суох үтүөрбүт биэс киһиэхэ төлөммөтө», — диэн этиллэр.
Эрдэ этиллибитин курдук, РФ бырабыыталыстыбата үлэ кэмигэр коронавирус дьаҥыгар сутуллубут медиссиинэ үлэһиттэригэр страховка былаанын оҥордо. Төлөбүр размера уонна страховка РФ бэрэсидьиэнин укааһынан бигэргэнэн турар.
РФ бэрэсидьиэнин уураҕар төлөбүрү ылар медперсонал категорията ыйыллар. Ол эбэтэр быраастар, орто, алын медперсонал, «суһал көмө» суоппардара ылаллар.
Төлөнөр харчы сууммата:
⁃ Медицина үлэһитэ ыалдьан үлэҕэ тахсыбат түгэнигэр төлөбүр 68,8 тыһыынча солкуобайга тэҥнэһэр;
⁃ Медицина үлэһитэ коронавирустан ыалдьан өлөр түгэнигэр, кини дьиэ кэргэнигэр 2,7 мөлүйүөн солкуобай төлөнөр;
⁃ Медицина үлэһитэ ыарыыга хаптаран баран кыайан үлэлиир кыаҕа суох, инбэлиитинэскэ тахсар түгэнигэр төлөбүр: III группалаах инбэлииттэргэ — 688 тыһыынча солкуобайга, II группалаах инбэлииттэргэ — 1,3 мөлүйүөн солкуобайга, I группалаах инбэлииттэргэ — 2 мөлүйүөн солкуобайга тэҥнэһэр.
Төлөбүрү страховой бэрэбиэркэ түмүгүн кэннэ, Социальнай страховой пуонда түһэрэр.
