Саха сиригэр ааспыт сууккаҕа 1 821,6
гектар иэннээх 13 ойуур баһаарын умуруордулар. Бу туһанан СӨ экология министиэристибэтин пресс-сулууспата иһитиннэрэр.
«Саха сиригэр билигин 99 355,8 гектар иэннээх 113 ойуур баһаарын умуруоруу үлэтэ бара турар», — диэн СӨ Экология миниистирин солбуйааччы Алексей Агеев эттэ.
Ол курдук, Горнайга 14 уот баар, Ньурбаҕа, Сунтаарга 11 бааһар, Үөһээ Бүлүүгэ —тоҕус, Хаҥаласка, Кэбээйигэ — аҕыстыы, Миирнэйгэ, Мэҥэ Хаҥаласка, Уус-Майаҕа — сэттэлии, Бүлүүгэ — алта, Ленскэйгэ — түөрт, Уус Алдаҥҥа, Өймөкөөҥҥө, «Өлүөнэ очуостара» пааркаҕа — үстүү, Өлүөхүмэҕэ, Томпоҕо, Дьокуускайга — иккилии, Аммаҕа, Тааттаҕа, Үөһээ Дьааҥыга, Нерюнгригэ, Намҥа уонна Өлүөхүмэ бобуулаах сиригэр биирдии ойуур баһаарын умуруоруу үлэтэ ыытыллар.
19 511,6 гектар иэннээх 22 баһаар бохсулунна: Үөһээ Бүлүүгэ (үс), Бүлүүгэ (түөрт), Нерюнгригэ (биир), Намҥа (биир), Ньурбаҕа (биир), Мэҥэ Хаҥаласка (биир), Хаҥаласка (биир), Уус Алдаҥҥа (биир), Ленскэйгэ (биир), Дьокуускайга (биир), «Өлүөнэ очуостара» пааркаҕа (икки) уонна Өлүөхүмэ бобуулаах сиригэр (биир).
Баһаары умуруорууга 2 552 киһи уонна 286 тиэхиньикэ үлэлээтэ.
Бүгүҥҥү күҥҥэ ыарахан балаһыанньа Горнай улууһугар турар, онно 14 ойуур баһаарын умуруораллар.
Оройуоҥҥа күүһү уонна үбү координациялааһыҥҥа Саха сирин тыатын хаһаайыстыбатын уонна ойууру харыстааһыҥҥа департаменын салайааччытын солбуйааччы Иннокентий Кычкин үлэлиир. Кини онно эбии күүһү ыытарга этии киллэрдэ, ону тэҥэ Дьокуускай бириэмэтинэн 11.00 чаастан Саха сирин оройуон сиригэр-уотугар авиамониторинг ыытыллыаҕа, ол түмүгэр күүһү уонна үбү күүһүрдүү боппуруоһа быһаарыллыаҕа.
Тыа Авиалесоохрана Саха сиринээҕи баазатын салайааччыта Владимир Леонов иһитиннэриитинэн, күн бүгүн оройуон үрдүнэн 14 салгын суудуналара авиамониториҥҥа үлэлиэхтэрэ.
Ону таһынан МИ-8 бөртөлүөт регион сэттэ оройуоннарыгар үлэлиэҕэ. Билигин Саха сирин 19 оройуоннарыгар баһаартан сэрэхтээх буолуу режима үлэлиир.
