Саха сиригэр ааспыт сууккаҕа эбии 29 киһи коронавирустаабыта бигэргэннэ. Бу туһунан бүгүн, муус устар 9 күнүгэр вице-премьер, өрөспүүбүлүкэтээҕи суһал штаб салайааччытын солбуйааччы Ольга Балабкина эпидемиологическай балаһыанньа туһунан брифинг кэмигэр иһитиннэрдэ.
Дьокуускайга 17 саҥа түбэлтэ бэлиэтэннэ, Мэҥэ Хаҥаласка, Миирнэйгэ, Нерюнгригэ, Тааттаҕа — иккилии, Алдаҥҥа, Ленскэйгэ, Чурапчыга, Эбээн Бытантайга биирдии киһи коронавирустаабыт.
«Өр кэм устата үчүгэй эпидемиологическэй быһыы-майгы турбут — Эбээн Бытантай улууһугар ыалдьыы түбэлтэлэрэ тахсыыларыгар ураты болҕомто ууруохпун баҕарабын. Өссө төгүл, улуустар икки ардыларынан сырыы уонна маассабай тэрээһиннэри ыытыы бэйэ куттала суох буолуутугар тирэнэн хааччахтаныахтааҕар, суһал штабтар салайааччыларын уонна олохтоохтор болҕомтолорун тардабын», — диэн эттэ.
Өрөспүүбүлүкэ лабораториялара бүтэһик суукка устата 1 856 коронавируска аналиһы чинчийбиттэр. Пандемия саҕаланыаҕыттан барыта 1 021 999 тест чинчийиллибит.
