Саха сиригэр ааспыт сууккаҕа 4 448,2 гектар иэннээх 37 ойуур баһаарын умуруордулар. Бу туһанан СӨ экология министиэристибэтин пресс-сулууспата иһитиннэрэр.
Саха сиригэр билигин 19 улууска 78 426,8 гектар иэннээх 103 ойуур баһаарын умуруоруу үлэтэ бара турар.
Ол курдук, Горнайга 12 уот баар, Үөһээ Бүлүүгэ уонна Ньурбаҕа 11 баһаар, Сунтаарга, Бүлүүгэ — тоҕустуу, Миирнэйгэ, Кэбээйигэ — алталыы, Мэҥэ Хаҥаласка, Уус-Майаҕа, Хаҥаласка — биэстии, Уус Алдаҥҥа — түөрт, Өймөкөөҥҥө, Ленскэйгэ, «Өлүөнэ очуостара» пааркаҕа — үстүү, Өлүөхүмэҕэ, Томпоҕо, Дьокуускайга —иккилии, Аммаҕа, Тааттаҕа, Нерюнгригэ, Намҥа уонна Өлүөхүмэ бобуулаах сиригэр биирдии ойуур баһаарын умуруоруу үлэтэ ыытыллар.
19 395,6 гектар иэннээх 20 баһаар бохсулунна: Үөһээ Бүлүүгэ (биэс), Бүлүүгэ (биэс), Аммаҕа (биир), Сунтаарга (биир), Нерюнгригэ (биир), Намҥа (биир), Ньурбаҕа (биир), Мэҥэ Хаҥаласка (биир), Уус Алдаҥҥа (биир), Ленскэйгэ (биир) уонна «Өлүөнэ очуостара» пааркаҕа (икки).
Баһаары умуруорууга 2 211 киһи уонна 279 тиэхиньикэ үлэлээтэ.
СӨ Экология министиэристибэтин ойуур харыстабылыгар департаменын салайар Владимир Иванов иһитиннэрбитинэн, куйаас күннэр сатыылаабыттара уонна этиҥнэр элбэхтэрэ, ойуур баһаардарыгар куттал үөскэтэр, быһыыны-майгыны уустугурдан биэрэр.
«Уот үксэ ыраах уонна уустук суоллаах-иистээх сирдэргэ турар. Олорго Экология министиэристибэтин ойуур баһаардарын умулларыга үлэлэһэр уонна Приморье, Хабаровскай кыраайдарыттан, Амур, Хакасия, Чита, Еврейскэй автономнай уобаластарыттан «Авиалесоохрана» ФБТ 349 исписэлииһэ үлэлиир», — диэн кэпсээтэ.
