Ааспыт сууккаҕа өрөспүүбүлүкэҕэ 99 киһи коронавирустаабыта бэлиэтэннэ.
Бу туһунан суһал штаб салайааччытын солбуйааччы Ольга Балабкина брифинг кэмигэр быһа эпииргэ иһитиннэрдэ.
«Саха сиригэр эпидемиологическай балаһыанньа уустук, COVID-19-нан 99 киһи ыарыйда. Дьокуускайга 51 киһи коронавирустаата, маны таһынан, Алдаҥҥа, уонна Ленскэйгэ биэстии киһи ыалдьыбыта бигэргэннэ», — диэтэ кини.
Үөһээ Бүлүүгэ, Миирнэйгэ, Нерюнгригэ түөртүү киһи коронавирустаата, Эдьигээҥҥэ, Уус Алдаҥҥа уонна Хаҥаласка — үстүү.
Аммаҕа, Бүлүүгэ, Мэҥэ Хаҥаласка, Уус Майаҕа, Чурапчыга уонна Эбээн Бытантайга суукка иһигэр иккилии киһи ыалдьыбыта бэлиэтэннэ.
Үөһээ Халымаҕа, Намҥа, Ньурбаҕа, Сунтаарга уонна Тааттаҕа биирдии киһи COVID-19-нан ыарыйда.
«Ыарыы элбэх сиргэ тарҕаммыт биричиинэтинэн, сайыҥҥы кэмҥэ дьон барар-кэлэр, аймахтарын көрсөр», — диэн Ольга Балабкина бэлиэтээтэ.
Кини этэринэн, Муниципальнай тэриллиилэр, оройуоннар суһал штабтара ылбыт дьаһалларын көмөлөрүнэн ыарыы киэҥник тарҕаммат.
