Саха сиригэр 2023 сыл ахсынньы 1 күнүгэр бэйэ дьыаланан дьарыктанар дьон ахсаана 43 603 киһиэхэ тэҥнэстэ. 2020 сылтан аахтахха 38 тыһыынча киһинэн элбээтэ.
2019 сылтан саҕаламмыт саҥа нолуок эрэһиимэ бэйэ дьарыгы дьоҥҥо-сэргэҕэ сайыннарар.
«Дьон бырааба көмүскэнэр буоллаҕына бэйэтин эрэх-турах сананар. Бэйэ дьарыктаах дьон үлэтин чэпчэтэр туһуттан барытын гына сатыыбыт», — диэн бэрэсидьиэн Владимир Путин эттэ.
Ол курдук, Горнай оройуон олохтооҕо Айта Петрова бэйэ дьыалатын арыммыта номнуо иккис сыла. Кини нэһилиэк дьаһалтатыттан көмө ылан паназиатскай куухуна бүлүүдэлэрин илдьэр-аҕалар сулууспа арыйбыта.
«Паназиатскай аһынан-үөлүнэн 2021 сыл сэтинньититтэн дьарыктанабын. Нэһилиэк дьаһалтатын кытта социальнай сөбүлэҥ баттаһаммын 250 тыһ солк үп-харчы ылбытым. Онон туһанаммын наадалаах тэрил ылынан аһы аадырыстарынан тиэрдэр сулууспа арыйбытым, бэйэ дьарыкпын олоххо киллэрбитим. Билигин хас биирдии баҕалаах киһи көмө ылан бэйэ дьыалатын кыайан арыйар, сайыннарар буолбута олус үчүгэй», – диэн кини эттэ.
Өрөспүүбүлүкэ үрдүнэн таһаҕас уонна киһи таһыыта, суоппар, парикмахер үлэтэ, маникюр уонна педикюр өҥөтө, бэйэ бородууксуйаны атыылааһын, маркетинг уонна реклама, кыбартыыра арендата бэйэ дьарык буолалларынан бэлиэтэнэллэр. Маннык дьоҥҥо чугас дьоҕус урбаан сайдыыта нэһилиэнньэ олоҕун-дьаһаҕын тупсарар.
