Өрөспүүбүлүкэҕэ субсидия көрүллэн бензинтэн гааска көһүү ороскуота 90% чэпчээтэ. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Бу сыалга бүддьүөттэн 24 мөл солк көрүлүннэ. Ону тэҥэ гааһынан барар массыыналаах дьоҥҥо тырааныспар нолуога 50% чэпчиэҕэ.
«Өрөспүүбүлүкэҕэ гаас оттукка көһүү уонна гаас саппараапкаларын ыстаансыйалара олохтоохторго экономическай, экологическай өттүлэринэн көдьүүстээх буолуоҕа. Саха сиригэр 2030 сылга диэри 40-ча гаас саппараапкаларын тутар былааннаахпыт. Ону тэҥэ, тырааныспар нолуогар чэпчэтии көрүлүннэ. Гааһынан барар массыына уонна гаас саппараапкалара элбииллэрэ экэниэмикэ да, экология да өттүнэн көдьүүстээх буолар», — диэтэ Ил Дархан Айсен Николаев.
Билигин Россияҕа бензин сыаната ортотунан 50 солк. тиийэр, айылҕа гаһын сыаната дойду саппараапкаларыгар 20-чэ солк. тэҥнэһэр.
«Бензин сыаната үрдээн, уматык сыаната бүддьүөт бары хайысхаларыгар күүскэ дьайар. Судаарыстыба өйөбүлүнэн, гааска көһүү 2-3 төгүл чэпчиэҕэ. Ил Дархан экология, экономика өттүнэн барыстаах уматыкка көһүүнү өйөөн, гааһынан барар массыыналары элбэтэр туһунан эппитэ сөп. Мантан дьон ороскуота эмиэ аҕыйыыр», — диэтэ СӨ бырамыысыланнас, геология миниистирэ Максим Терещенко.
