Өрөспүүбүлүкэҕэ биир кэлим босуобуйаҕа уопсайа 17 141 сайабылыанньа киирбит. Олортон 3 033 сайабылыанньаны өйөөбүттэр.
Бу туһунан тохсунньу 18 күнүгэр СӨ үлэҕэ уонна социальнай сайдыыга миниистирин солбуйааччыта Елена Теплякова брифиҥҥэ иһитиннэрдэ.
Дьиэ кэргэн Биир кэлим босуобуйаҕа көһөрүгэр, эрдэ ыла сылдьыбыт босуобуйата сотуллар. Ол аата иккиттэн биирин талыаy наада – ыла сылдьар босуобуйатын эбэтэр биир кэлим босуобуйаны.
«Өскөтүн дьиэ кэргэн 100% тиийинэн олоруу алын кээмэйинэн социальнай төлөбүрү туһанар буоллаҕына, төлөнөр болдьоҕо бүтүөр диэри кэтэһэ түһүөн наада, ол кэннэ биирдэ биир кэлим босуобуйаҕа сайабылыанньа суруйаллара ордук», — диэн Елена Теплякова эттэ.
Оттон өскөтүн дьиэ кэргэн тиийинэн олоруу алын кээмэйиттэн 50% эбэтэр 75% ылар буоллаҕына, биир кэлим босуобуйаҕа тута сайаапка түһэриэн сөп. Ол эрээри, Елена Теплякова эппитинэн, биир кэлим босуобуйа саҥа усулуобуйаларыгар олоҕуран, төлөбүр кээмэйэ кыччыан сөп эбэтэр усулуобуйаҕа эппиэттээбэт буоллаҕына аккаас кэлиэн сөп.
Социальнай пуонда салаата аккаас биэрдэҕинэ даҕаны, эрдэтээҥҥи босуобуйа оннунан хаалар, болдьоҕо бүтүөр диэри төлөнөр.
Биир кэлим босуобуйаҕа сайабылыанньаны «Судаарыстыбаннай өҥөлөр» порталга толоруохха сөп эбэтэр «Мин докумуоннарым» киин нөҥүө биэриэххэ сөп. Ону тэҥэ, Социальнай пуонда территориальнай салаатыгар тиийэн суруйуохха сөп.
2023 сыл тохсунньу 1 күнүттэн көрүллэр биир кэлим босуобуйаҕа дьиэ кэргэн дохуотуттан көрөн төлүүллэр – Саха сиригэр тиийинэн олоруу алын кээмэйиттэн үрдүк буолуо суохтаах: бастакы балаһаҕа – 25 396 солк., иккис балаһаҕа – 21 272 солк.
