Өрөспүүбүлүкэҕэ 154 тыһыынчаттан тахса оҕо балаҕан ыйын биир күнүттэн үөрэниэҕэ.
Аан бастаан оскуола боруогун 15 285 оҕо атыллыаҕа. Орто уонна үрдүк үөрэх кыһаларыгар 48 тыһыынчаттан тахса үөрэнээччи устудьуон үрдүк аатын сүгүөҕэ.
Ил Дархан Айсен Николаев Саха сирин олохтоохторун Билии күнүнэн эҕэрдэлээтэ.
«Пандемия усулуобуйатыгар дистанционнай көрүҥ үөрэтиигэ сыаналаммат уопут ыллыбыт. Үгэс буолбут үөрэҕи кытта дьүөрэлээн, бастыҥ үөрэҕи ыларга инникитин олук буолуоҕа. Ыарахаттары бары бииргэ ааһыахпыт уонна үөрэхпитигэр, үлэбитигэр уурбут сырабыт ситиһиигэ кынаттыаҕа диэн эрэнэбин», — диэтэ Айсен Николаев.
Маны таһынан, үөрэх хаачыстыбатын үрдэтиигэ биир кэлим үлэ салҕанарын иһитиннэрдэ.
«Олорор сириттэн тутулуга суох, оҕолорго тэҥ усулуобуйаны тэрийии, былаас быһыытынан, биһиги сорукпут буолар. Быйыл Наука аччыгый академията уонна Арктическай оскуола аһыллыаҕа, «Точка роста» Цифровой уонна гуманитарнай үөрэхтээһин кииннэрэ тэриллэллэр», — диэн баһылык эҕэрдэ тылыгар этиллэр.
Үөрэнээччилэри, төрөппүттэри уонна үөрэхтээһин үлэһиттэрин өрөспүүбүлүкэ бырабыыталыстыбатын э.т. Андрей Тарасенко эҕэрдэлээтэ.
«Быйылгы балаҕан ыйын 1 күнэ — ураты күн. Биһиги саҥа үөрэх дьылын эрэ буолбакка, Саха сирин үөрэҕириитин систиэмэтин саҥа кэрдииһин бэлиэтиибит. Ис сүрэхтэн үөрэнээччилэри, учууталлары уонна төрөппүттэри Билии күнүнэн эҕэрдэлиибин уонна ситиһиини баҕарабын», — диэн Андрей Тарасенко бэйэтин Twitter-ыгар суруйда.
Бэйэтин эҕэрдэ тылыгар, вице-премьер Ольга Балабкина оҕо үөрэҕин хаамыытыгар төрөппүттэр, учууталлар уонна медицинэ үлэһиттэрин түмсүүлэрэ суолталааҕын бэлиэтээтэ.
«Билигин туохтааҕар да оҕолор, төрөппүттэр, учууталлар, медицинэ үлэһиттэрэ, былаас уорганнара уонна бүтүн уопсастыба сомоҕолоһуута улахан суолталаах. Саҥа уустук усулуобуйаҕа бииргэ үлэлии уонна билиини ыла үөрэниэхпит. Бу уопут билии ыларга саҥа көрүҥ уонна ньыма сайдарыгар тирэх буолуоҕа», — диэтэ Ольга Балабкина.
