Саха сиригэр коронавирус инфекциятын британиятааҕы штаммын икки түбэлтэтэ бигэргэннэ. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
Икки түбэлтэ иккиэн Турцияҕа баран кэлбит Дьокуускай дьиэ кэргэнигэр бэлиэтэннилэр.
Ил Дархан Айсен Николаев бүгүн, муус устра 20 күнүгэр өрөспүүбүлүкэтээҕи суһал штаб мунньаҕын ыытта.
Өрөспүүбүлүкэ баһылыгын пресс-сэкэрэтээрэ Афанасий Ноев Саха сиригэр коронавирус балаһыанньата тыҥааһыннааҕын бэлиэтиир.
«Британиятааҕы штамм быдан түргэнник тарҕанарынан сибээстээн, Дьокуускайга улахан куттал үөскээтэ. Ону таһынан, Саха сирин элбэх олохтооҕо тас дойдуларга сынньана сылдьар, ол иһигэр Турцияҕа. Онон коронавирус инфекциятын саҥа штаммын аҕалыы түгэннэрэ хатыланыахтарын сөп», — диэн Айсен Николаев эттэ.
Ил Дархан тас дойдулартан кэлэр дьон хонтуруолун олохтуурга соруйда. Ол курдук, кэлээччилэр ПЦР тесты туттараллара уонна түмүгүн судаарыстыбаннай өҥө порталыгар угаллара ирдэнэр.
Дьон маассабай бырааһынньыктары тэрийбэтин, кэллэктиибинэн айылҕаҕа тахсыбатын туһугар, улуустааҕы суһал штабтарга нэһилиэнньэни сэрэтэр үлэни күүһүрдэргэ этилиннэ.
Ону таһынан маскалаах сылдьыы эрэһиимин, уопсастыбаннай миэстэлэргэ уонна тырааныспарга социальнай арыты тутуһуу хонтуруола күүһүрүөҕэ.
Оҕо уһуйааннарыгар, оскуолаларга, колледжтарга уонна үрдүк үөрэх кыһаларыгар дезинфекциялааһыҥҥа ураты болҕомто ууру ирдэнэрин Ил Дархан бэлиэтээтэ.
Ону таһынан Айсен Николаев дьон олорор социальнай тэрилтэлэргэ бары санитарнай-эпидемиологическэй ирдэбиллэри бэрэбиэркэлииргэ уонна хааччыйарга эттэ.
