Нерюнгри олохтооҕун кытта түөкүттэр полиция, баан уонна Куттала суох буолуу федеральнай сулууспа үлэһитин аатыттан кэпсэппиттэр. Бу туһунан Россия Ис дьыала министиэристибэтин Саха сиринээҕи салаатын пресс-сулууспата иһитиннэрэр.
28 саастаах бырамыысыланнай тэрилтэ лабораныгар быраабы харыстыыр уорганнар үлэһиттэрин аатыттан кыыс эрийбит. Уонна бу күннэргэ кини баан каартатынан туһаммытын туоһуласпыт.
Бу кэнниттэн Киин баан үлэһитэ эрийэн сиһилии быһаарыа диэбит. Тута иккис кыыс эрийэн баан үлэһитэбин диэбит, кини аатыгар кирэдьиит ылаары гыммыттарын, холуобунай дьыала тэриллибитин туһунан иһитиннэрбит. Салгыы «Куттала суох буолуу федеральнай сулууспа үлэһитэ» эрийэн түөкүттэри тохтотор сыалтан баан үлэһиттэрэ этэллэрин толорор наадатын эппит.
Баан сымыйа үлэһитэ Нерюнгри олохтооҕун тылыгар киллэрэн, чугас баар банкоматтан харчытын устарыгар уонна эппит нүөмэригэр ыытарыгар күһэйбит. Манан тохтооботохтор. Салгыы дьахтар аатыгар кирэдьиит ылларан «баан страховой счетугар» ыыттарбыттар.
Түмүккэ дьахтар түөкүттэргэ 412 тыһыынча солкуобайы ыыппыт, уурунуу харчытыттан маппыт, эбиитин кирэдьиит төлүүр иэстээх хаалбыт.
