Өрөспүүбүлүкэҕэ 2024 сыл түмүгүнэн дьиэ тутуутугар историяҕа киирбит көрдөрүүлэри куоһардылар.
Бу туһунан Ил Дархан Айсен Николаев бүгүн, тохсунньу 10 күнүгэр, тутуу хайысхатын сайыннарыытын мунньаҕар иһитиннэрдэ.
Ол курдук, 744 тыһ.кв.м. тутан 1990 сыллаахха олохтоммут рекорду куоһардылар.
«2024 сыл Саха сирин тутуутун хайысхатыгар ситиһиилээх буолла. Биһиги дьиэ тутуутугар 750 кэриҥэ тыһ.кв.м. киллэрэн өрөспүүбүлүкэ историятыгар саҥа рекорду олохтоотубут», — диэн Айсен Николаев эттэ.
Кини ааспыт сыл сүрүн ситиһиилэрин ортолоругар 61 социальнай эбийиэк тутуллубутун ааттаата, ол иһигэр уопсай үөрэхтээһин 15 эбийиэгэ, түөрт уһуйаан, үс үөрэх атын эбийиэгэ, алта физическэй култуура уонна спорт эбийиэгэ, 18 доруобуйа харыстабылын эбийиэгэ уонна 15 култуура эбийиэгэ кииристилэр. «Служба государственного заказчика РС(Я)» хайысхатынан 22 эбийиэк үлэҕэ киирбитэ.
Ону тэҥэ бэрэсидьиэн Владимир Путин көҕүлээбит «Жилье и городская среда» национальнай бырайыак «Переселение граждан из аварийного жилищного фонда на 2019–2025 годы» өрөспүүбүлүкэтээҕи бырагыраама чэрчитинэн 46,89 тыһ киһини 887,66 тыһ.кв.м. хаарбах дьиэттэн көһөрдүлэр. 2025 сыл бүтүөр диэри 48 тыһ тахса киһини көһөрөр былааннанар.
