Ааспыт сууккаҕа Саха сиригэр эбии 193 киһи коронавирустаабыта бигэргэннэ.
Бу туһунан вице-премьер, өрөспүүбүлүкэтээҕи суһал штаб салайааччытын солбуйааччыта Ольга Балабкина бүгүн, ахсынньы 23 күнүгэр, эпидемиологическай балаһыанньа туһунан брифинг кэмигэр иһитиннэрдэ.
Дьокуускайга 88 саҥа түбэлтэ бэлиэтэннэ, Миирнэйгэ — 15, Нерюнгрига — 13, Алдаҥҥа — 10, Мэҥэ Хаҥаласка — аҕыс, Ленскэйгэ — сэттэ, Аммаҕа — алта, Аллараа Халымаҕа уонна Уус Алдаҥҥа — биэстии, Дьааҥыга, Бүлүүгэ уонна Намҥа — түөртүү, Кэбээйигэ, Тааттаҕа уонна Томпоҕо — үстүү, Горнайга, Муомаҕа, Өлөөҥҥө уонна Уус Майаҕа — иккилии, Үөһээ Бүлүүгэ, Ньурбаҕа, Өймөкөөҥҥө, Өлүөхүмэҕэ, Сунтаарга, Хаҥаласка уонна Чурапчыга — биирдии киһи коронавирустаата.
Түөрт коронавирустаабыт киһи тыына быһынна.
Бүтэһик суукка устата өрөспүүбүлүкэ лабораториялара 2599 коронавируска аналиһы чинчийдилэр. Пандемия саҕаланыаҕыттан барыта 848 078 тест чинчийилиннэ.
