Ааспыт сууккаҕа Саха сиригэр эбии 88 киһи коронавирустаабыта бигэргэннэ. Бу туһунан бүгүн, олунньу 5 күнүгэр вице-премьер, өрөспүүбүлүкэтээҕи суһал штаб салайааччытын солбуйааччы Ольга Балабкина эпидемиологическай балаһыанньа туһунан брифинг кэмигэр иһитиннэрдэ.
Дьокуускайга 38 саҥа түбэлтэ бэлиэтэннэ, Миирнэй оройуонугар — 16, Томпоҕо — 11, Алдаҥҥа — алта, Нерюнгригэ — биэс, Өлүөхүмэҕэ — үс, Булуҥҥа, Бүлүүгэ уонна Мэҥэ Хаҥаласка — иккилии, Эдьигээҥҥэ, Тааттаҕа уонна Хаҥаласка — биирдии киһи коронавирустаабыт.
Суукка устата өрөспүүбүлүкэ лабораториялара 2 209 коронавируска аналиһы чинчийдилэр, пандемия саҕаланыаҕыттан барыта 929 707 тест чинчийиллибит.
