Өрөспүүбүлүкэҕэ кулун тутар 23-29 күннэригэр инфекционнай ыарыылары сэрэтэр нэдиэлэ ыытыллар. Нэдиэлэ аан дойдутааҕы туберкулеһу утары охсуһар күҥҥэ ананар. Сыала-соруга – нэһилиэнньэҕэ доруобуйаны көмүскүүр миэрэлэри, инфекциялар тарҕаныыларын сэрэтии, кэмигэр диагностиканы ааһар дьоһуннааҕын сырдатыы.
«Инфекционнай ыарыылар киһи доруобуйатыгар дьоҕус организмнар дьайыыларыттан тахсаллар уонна ыалдьыбыт киһиттэн доруобай киһиэхэ сыстыан сөптөөхтөр. Аан дойдутааҕы доруобуйаны харыстыыр тэриллии дааннайынан, үгүс ыарыылар инфекциялартан тахсаллар, ол эрээри, судургу сэрэтэр миэрэлэри тутустахха үгүс ыарыыга ылларымыахха сөп. Бу маннык сэрэтэр үлэҕэ туберкулеһу утары ыытыллар үлэ анал миэстэни ылар. Бу сылга Саха сирин мэдиссиинэ тэрилтэлэригэр туберкулеһу утары ый биллэриллибитэ уонна кулун тутар 24 күнүттэн муус устар 24 күнүгэр диэри буолуоҕа. Бу сыала — нэһилиэнньэ ырааһы тутуһарын үрдэтии, эмтэнии уонна диагностика аныгы ньымаларын сырдатыы, чөл олоххо тардыы», – диэн министиэристибэҕэ бэлиэтээтилэр.
Онон муус устар 24 күнүгэр диэри СӨ Доруобуйаҕа харыстабылын саайтыгар, тэлэбиидэнньэҕэ, араадьыйаҕа, СМИ-га, социальнай ситимнэргэ, видеороликтар уонна буклеттар көмөлөрүнэн сырдатыы үлэтэ ыытыллыаҕа. Ону тэҥэ үөрэх уонна мэдиссиинэ тэрилтэлэригэр лиэксийэлэр, көрсүһүүлэр, семинардар ыытыллыахтара.
Диспансеризацияҕа уонна ФЛГ-га 122 Биир кэлим контакт-киин нүөмэринэн суруттарыахха сөп эбэтэр поликлиника регистратуратыгар, «Госуслуга» порталыгар. Диспансеризацияны ааһарга паспорт уонна полис ирдэнэр.
Хаартыска: sakha.gov.ru
