Коронавирус инфекцията тарҕаныытын сэрэтэр миэрэлэринэн олохтоммут хааччахтааһын Саха сирин үрдүнэн бэс ыйын 26 күнүгэр диэри уһатылынна. Бу туһунан Ил Дархан Айсен Николаев бүгүн, бэс ыйын 19 күнүгэр брифинг кэмигэр иһитиннэрдэ.
«Саха сирин олохтоохторо, чуолаан атыы-эргиэн тэрилтэлэрэ санитарнай-эпидемиологическэй ирдэбиллэри тутуһаллара булгуччулаах. Билигин үгүстэр ыарыы тарҕаныыта намтаан эрэр дии саныыллар да, оннук буолбатах. Дьон салгыы санитарнай нуорманы, дьаһалы аахсыбатахтарына, карантинтан өр тахсыахпыт суоҕа», — диэн Айсен Николаев эттэ.
Бүтэһик сууккаҕа өрөспүүбүлүкэ үрдүнэн эбии 97 киһи коронавирустаата. Ыарыы туруоҕуттан Саха сирин үрдүнэн уопсайа 3486 киһи ыарыйда, 2197 киһи үтүөрдэ, 24 киһи тыына быһына.
