Ил Дархан Айсен Николаев өрөспүүбүлүкэҕэ коронавирус инфекцията тарҕаныытын сэрэтиигэ ирдэнэр тустаах тэрээһиннэр толору ылыллан туралларын тириэрдэр.
«Бүгүҥҥү күн туругунан Саха сиригэр коронавируһунан ыалдьыы түбэлтэтэ бэлиэтэммэт. Суһал көмө сулууспатын уонна медицинскэй тэрилтэлэр үлэһиттэрин көрдөххүтүнэ аймалҕаҥҥа ылларбаккытыгар көрдөһөбүн, бу инструкциянан ирдэнэр миэрэлэр», – диэн Ил Дархан бэйэтин Instagram социальнай ситимҥэ баар сирэйигэр иһитиннэрдэ.
Саха сиригэр Роспотребнадзор уонна дойду доруобуйа харыстабылын министиэристибэтин ирдэбилигэр сөп түбэһэр сэрэтэр уонна хонтуруоллур тэрээһиннэр толору ыытыллалларын Айсен Николаев тоһоҕолоото.
«Тустаах сулууспалар тас дойдулартан, ону тэҥэ Уһук Илин уонна Сибиир сорох куораттарыттан кэлбит дьону барыларын булгуччу бэрэбиэркэлииллэр. Ону таһынан күннэтэ Дьокуускай куорат балыыһаларыгар тумуулаабыт уонна гирииптээбит сибикилээх Азия дойдуларыгар сылдьан кэлбит дьон эмиэ хонтуруолга ылыллаллар», – диэн Ил Дархан түмүктээтэ.
Инники этиллибитинэн, СӨ доруобуйа харыстабылын министиэристибэтэ коронавируһунан ылдьыы сибикитэ тахсыбыт түбэлтэтин барытын бэрэбиэркэлиир.
