Ыам ыйын 12 күнүгэр региональнай суһал штаб салайааччытын солбуйааччыта Ольга Балабкина брифиҥҥэ иһитиннэрбитинэн, COVID-19 ыарыыттан муҥутуур сэрэхтээх буолуу эрэһиимин тохтотор туһунан ыйаах бэлэмнээбиттэр.
«Бэҕэһээ Ил Дархан Айсен Николаевка СӨ Роспотребнадзор управлениетын салайааччыта Маргарита Игнатьева коронавирустан муҥутуур сэрэхтээх буолуу эрэһиимин уһуларга этии киллэрбит. Билиҥҥи туругунан, ыйаах бэлэм, илии баттанара хаалла», — диэн эттэ.
Маргарита Игнатьева этэринэн, Саха сиригэр коронавируһунан ыалдьыы түбэлтэтэ намтаабыт.
«Штамм таһыма уларыйда, бүгүҥҥү туругунан, ыарыы ОРВИ курдук чэпчэкитик ааһар. Ол эрээри, коронавирус туһунан умнумуохха наада, дьыл кэмэ уларыйыытыттан эмиэ тутулуктаах. Итиэннэ, саҥа штамм үөскүөн эмиэ сөп. Ол иһин профилактическай уонна эпидемия утары тэрээһиннэри салҕыахха наада», — диэн эттэ.
СӨ доруобуйаҕа харыстабылын миниистирэ Лена Афанасьева бэлиэтээбитинэн, национальнай халандаар чэрчитинэн вакцинаны ылыы салҕанар. Балыыһаларга профилактическай кэтээн көрүү үлэтин ыыталлар.
